بے‌پردہ‌گھومنے‌والی‌عورتوں‌پر‌نظر‌پڑنے‌کا‌گناہ‌کس‌پر‌ہوگا؟

سوال:۔

آج کل جو مسلمان خواتین بغیر پردے کے بازار وغیرہ میں گھومتی رہتی ہیں اور ان پر ہماری یعنی غیرمحرَم کی نگاہ پڑتی ہے، اب آپ یہ بتائیں کہ اس کا گناہ کن کے سر پر ہوگا؟ کیونکہ آج کل نیچے نگاہ کرکے چلنا اپنی موت کو دعوت دینا ہوتا ہے، یہ ٹھیک ہے کہ موت برحق ہے لیکن اِحتیاط بھی ضروری ہے۔

جواب:۔

جو خواتین بن سنوَر کر بے پردہ بازاروں میں گھومتی پھرتی ہیں، وہ اپنے اس فعل کی وجہ سے ۔۔۔جس کو قرآنِ کریم نے ’’تبرّجِ جاہلیت‘‘ فرمایا ہے۔۔۔ گنہگار ہیں۔(۱) اور جو مرد ان کو قصداً گھورتے ہیں، وہ اپنے فعل کی وجہ سے گنہگار ہیں۔(۲) اگر کسی نامحرَم پر اَچانک آدمی کی نظر پڑجائے اور فوراً اسے ہٹالے تو گنہگار نہیں ہوگا۔ (۳)

رہا یہ کہ نظریں نیچی کرکے چلنا مشکل ہوگا، تو یہ بات صحیح نہیں۔ اللہ تعالیٰ کے بہت سے بندے آج بھی ایسے ہیں جو نامحرَموں کو نہیں تکتے، بلکہ اپنی نظر کی حفاظت کرتے ہیں۔ اس کے لئے اتنی نظر نیچی کرنا ضروری نہیں کہ راستے کی چیزیں ہی نظر نہ آئیں، بلکہ مقصد یہ ہے کہ بے پردہ عورتوں کی طرف نظروں کو آوارہ نہ چھوڑا جائے۔