جس‌ذخیرہ‌اندوزی‌سے‌لوگوں‌کو‌تکلیف‌ہو‌وہ‌بُری‌ہے

سوال:۔

ذخیرہ اندوزی کا کیا حکم ہے؟

جواب:۔

ذخیرہ اندوزی کی کئی صورتیں ہیں، اور ہر ایک کا حکم جدا ہے۔ ایک صورت یہ ہے کہ کوئی شخص اپنی زمین کا غلہ روک رکھے اور فروخت نہ کرے، یہ جائز ہے۔(۱) لیکن اس صورت میں گرانی اور قحط کا انتظار کرنا گناہ ہے،(۲) اور اگر لوگ تنگی میں مبتلا ہوجائیں تو اس کو اپنی ضرورت سے زائد غلہ کے فروخت کرنے پر مجبور کیا جائے گا۔(۳)

دُوسری صورت یہ ہے کہ کوئی شخص غلہ خرید کر ذخیرہ کرتا ہے، اور جب لوگ قحط اور قلّت کا شکار ہوجائیں تب بازار میں لاتا ہے، یہ صورت حرام ہے۔(۴) آنحضرت صلی اللہ علیہ وسلم نے اس کو ملعون قرار دیا ہے۔(۵)

تیسری صورت یہ ہے کہ بازار میں اس جنس کی فراوانی ہے اور لوگوں کو کسی طرح کی تنگی اور قلّت کا سامنا نہیں، ایسی حالت میں ذخیرہ اندوزی جائز ہے،(۶) مگر گرانی کے انتظار میں غلے کو روک رکھنا کراہت سے خالی نہیں۔(۷)

چوتھی صورت یہ ہے کہ انسانوں یا چوپایوں کی خوراک کی ذخیرہ اندوزی نہیں کرتا، اس کے علاوہ دیگر چیزوں کی ذخیرہ اندوزی کرتا ہے، جس سے لوگوں کو تنگی لاحق ہوجاتی ہے، یہ بھی ناجائز ہے۔(۸)