زیادہ‌مہر‌رکھنے‌پر‌لوگ‌بُرا‌کیوں‌مناتے‌ہیں؟‌جبکہ‌اسلام‌نے‌زیادہ‌کی‌حد‌مقرّر‌نہیں‌کی؟

سوال:۔

جناب مولانا صاحب! ۱۹؍اکتوبر ۱۹۹۵ء کو پاکستان ٹی وی۲ پر ایک پروگرام عورتوں کے حقوق سے متعلق تھا، اس میں مقرِّر نے حق مہر کے بارے میں فرمایا کہ جتنا زیادہ ہو، وہ اچھا ہے۔ قرآن کا حوالہ دیا کہ اگر بیوی کو سونے کا ڈھیر بھی دے دو تو اس میں سے واپس نہیں لینا۔ حضرت عمر فاروقؓ کا واقعہ سنایا کہ انہوں نے عورتوں کے لئے حق مہر کی حد مقرّر کرنا چاہی تو ایک عورت نے کھڑے ہوکر کہا کہ آپ کون ہوتے ہیں حد مقرّر کرنے والے؟ تب حضرت عمرؓ نے کہا کہ اچھا ہوا تم نے مجھے ایک غلطی سے روکا۔ شادی میں حق مہر پر جھگڑا رہتا ہے اور شرعی حق مہر کی جب بات ہوتی ہے تو وہ کچھ اور بتاتے ہیں کہ حضور صلی اللہ علیہ وسلم نے حق مہر اتنا ہی فرمایا ہے، آپ حق مہر کے بارے میں بتائیں کتنا ہونا چاہئے اور زیادہ دینا دُرست ہے کہ نہیں؟

جواب:۔

حضرت اِمام ابوحنیفہؒ کے نزدیک مہر کی کم سے کم مقدار دس درہم (یعنی ۲تولے ساڑھے سات ماشے چاندی) ہے،(۱) زیادہ سے زیادہ کی کوئی حد نہیں، حتیٰ کہ پوری دُنیا کی دولت بھی ایک عورت کا مہر ہوسکتی ہے۔ البتہ شریعت نے چند اُمور کی رہنمائی فرمائی ہے:

۱:۔ مہر میں تفاخر صحیح نہیں کہ محض نمائش کے لئے زیادہ سے زیادہ مقرّر کیا جائے، بلکہ جتنا مہر (اور دیگر مصارف) کم ہوں، نکاح اسی قدر موجبِ برکت ہوگا۔(۲)

۲:۔ مہر مقرّر کرتے وقت نیت اس کے ادا کرنے کی ہونی چاہئے، حدیث میں ہے کہ جو شخص عورت کا مہر اَدا کرنے کا اِرادہ نہ رکھتا ہو، وہ زانی ہے (مجمع الزوائد ص:۲۸۴، ابن ابی شیبہ ج:۴ ص:۳۶۰)۔(۳)

آنحضرت صلی اللہ علیہ وسلم کی ازواجِ مطہراتؓ اور بناتِ طاہرات کا مہر پانچ سو درہم تھا (یعنی ۱۳۱ تولے ۳ماشے چاندی)، ایک مسلمان کو اس کی رغبت ہونی چاہئے۔(۴)