طلاق‌کے‌بعد‌جہیز‌کا‌سامان‌کس‌کا؟

سوال:۔

میری بھانجی کی شادی کچھ عرصہ قبل ایک شخص سے ہوئی، اس شادی کو بمشکل سات ماہ کا عرصہ گزرا کہ اس نے اپنے گھر والوں کی بار بار شکایات جو کہ خط، ٹیلی فون اور دستی خطوط کے ذریعے اِرسال کئے تھے، تنگ آکر میری بھانجی کو تین طلاقیں اِرسال کردیں۔ یہ طلاق اس نے کیسٹ میں بھر کر اِرسال کیں۔ کیسٹ کو میری ممانی لائی اور میری چھوٹی ہمشیرہ کو لاکر دی، جسے ان لوگوں نے سنا۔ اب آپ سے یہ مؤدّبانہ عرض ہے کہ اس طلاق نامے کی شرعی حیثیت کیا ہے؟ کیا اس طرح سے طلاق ہوگئی ہے؟ نیز لڑکی کا مہر اور دیگر سامان جو لڑکی کو ماںباپ کی جانب سے شادی کے موقع پر دِیا جاتا ہے، مثلاً چند تولے سونا، کپڑا، برتن اور دیگر گھریلو سامان جو کہ خالص لڑکی کے نام ہے، ان تمام اشیاء کے بارے میں بھی قرآن وسنت کی روشنی میں بتائیں کہ ان پر لڑکی کا حق ہے یا نہیں؟

جواب:۔

اگر محمد اَیوب نے طلاق کے الفاظ اپنی زبان سے ادا کئے ہیں تو تین طلاق واقع ہوگئیں۔(۱)

۲:۔ لڑکی کا پورا مہر شوہر کے ذمے لازم ہے، کیونکہ لڑکی اپنے شوہر کے گھر آباد ہوچکی ہے۔(۲)

۳:۔ جہیز کا جو سامان لڑکی کے میکے والوں نے دیا تھا، وہ لڑکی کی ملکیت ہے،(۳) اس کا واپس کرنا سسرال والوں کا فرض ہے، اور ان کا اس سامان کے دینے سے اِنکار کرنا حرام اور گناہِ کبیرہ ہے۔(۴)