کیا‌سات‌روزہ‌تراویح‌جائز‌ہے‌جبکہ‌تلفظ‌بھی‌صحیح‌نہیں‌ہوتا؟

سوال:۔

کیا پانچ روزہ یا سات روزہ تراویح اِبتدائے اسلام سے رائج ہے یا ہم نے اپنی سہولت کے لئے اسلامی قدروں کو اپنی مرضی سے ڈھال لیا؟ جبکہ تلفظ اور صحیح ادائیگی نہایت ضروری ہے، یہاں یہ پتا ہی نہیں چلتا کہ پیش اِمام صاحب کیا پڑھ رہے ہیںْ بس قرآن ختم ہوگیا پانچ دنوں میں۔

جواب:۔

تراویح کی نماز پورے رمضان المبارک کی سنتِ مؤکدہ ہے۔(۱) اور تراویح میں پورا قرآنِ کریم سننا ایک مستقل سنت ہے۔(۲) جو حضرات پانچ یا سات دن میں قرآن مجید سن لیتے ہیں، وہ تراویح کی نماز سے فارغ نہیں ہوجاتے، بلکہ پورے رمضان تراویح ادا کرنا ان کے ذمے رہتا ہے۔(۳)

تراویح میں قرآن سنانے کے لئے یہ شرط ہے کہ ایسا صاف پڑھا جائے کہ ایک ایک لفظ سمجھ میں آئے، جو لوگ اتنا تیز پڑھتے ہیں کہ کچھ پتا نہیں چلتا کہ کیا پڑھ رہے ہیں، وہ نہایت غلط کرتے ہیں، ان کا پڑھنا نہ پڑھنا برابر ہے، بلکہ اس طرح پڑھنا ثواب کے بجائے موجبِ وبال ہے۔(۴)