کیا‌جمعہ‌کے‌لئے‌صرف‌چار‌سنت‌دو‌فرض‌ہی‌کافی‌ہیں؟

سوال:۔

آج کل بالخصوص ایک غلط روایت عام ہوتی جارہی ہے کہ ایک تو ویسے ہی ہم نام نہاد مسلمان اللہ تعالیٰ کو اپنی روزمرّہ زندگی میں بہت کم یاد کرتے ہیں، اور نمازیں وغیرہ بھی نہیں پڑھتے، اور جمعہ کو اگر نمازِ جمعہ پڑھنے کے لئے مسجد آہی جاتے ہیں تو ہمیں واپس بھاگنے کی اتنی جلدی ہوتی ہے کہ دو رکعت فرض کی ادائیگی کے بعد آدھی مسجد نمازیوں سے خالی ہوجاتی ہے۔ جہاں تک میری معلومات کا تعلق ہے، فرض نماز باجماعت اور مسجد میں اَدا کرنا افضل ہے، جبکہ سنتیں اور نوافل وغیرہ کی ادائیگی گھر پر زیادہ ثواب کے حصول کا سبب بنتی ہے، لیکن عام لوگوں کی اکثریت جو مسئلے کو نہیں سمجھتی، جن میں بالخصوص نوجوان اور بچے شامل ہیں، ان چند صحیح افراد کی تقلید میں جو مسئلے کو سمجھتے ہیں لاشعوری طور پر صرف دو رکعت کی ادائیگی کے بعد مسجد سے راہِ فرار اِختیار کرتے ہیں، اور گھر جاکر بقیہ نماز مکمل نہیں کرتے اور یہ سمجھتے ہیں کہ انہوں نے پورے ہفتے کا قرض اُتار دیا ہے۔ کیا دو رکعت فرض کی ادائیگی سے جمعہ کی نماز ادا ہوجاتی ہے اور بقیہ رکعتیں پڑھنا ضروری نہیں؟ یہ مسئلہ اتنی وسعت اِختیار کرچکا ہے کہ وہ بچے جو آج بچے ہیں، نمازِ جمعہ کو صرف چار سنت اور دو فرض ہی کے برابر سمجھنے لگے ہیں۔

جواب:۔

پنج گانہ نماز اِسلام لانے کے بعد سب سے اہم فرض ہے، اس میں سستی اور کوتاہی کرنا سب سے بڑا گناہِ کبیرہ ہے، حدیث میں فرمایا گیا (جس کا مفہوم ہے) کہ قیامت کے دن سب سے پہلے بندے کی نماز کا حساب ہوگا، وہ نماز میں کامیاب نکلا تو اِن شاء اللہ باقی چیزوں میں کامیاب ہوگا، اور اگر نماز میں ناکام رہا، تو باقی چیزوں میں بدرجۂ اَوْلیٰ ناکام ہوگا۔(۱) اس لئے مسلمان بھائیوں کو فرض نماز میں ہرگز سستی نہیں کرنی چاہئے، اور نماز کا مسجد میں باجماعت ادا کرنا اِیمان کی علامت ہے، اور نماز باجماعت میں کوتاہی اور سستی کرنا نفاق کی علامت ہے۔ اس لئے نماز باجماعت ادا کرنا اہم ترین واجب ہے۔(۲)

اور نماز کی سنتیں اور نوافل درحقیقت فرائض کی تکمیل کے لئے ہیں، کیونکہ جس درجے کے سکون واِطمینان، خشوع وخضوع اور حضورِ قلب کے ساتھ نماز اَدا کرنی چاہئے، ہم اس کا عشر عشیر بھی پورا نہیں کرتے۔ اس لئے اللہ تعالیٰ نے اپنی رحمت سے فرائض کی تکمیل کے لئے سنتیں اور نفل نماز مقرّر کردی تاکہ فرائض کی کمی ان سے پوری ہوجائے، اس لئے سنتیں بھی پورے اِہتمام سے ادا کرنی چاہئیں۔(۳) جمعہ کی نماز سے پہلے چار سنت مؤکدہ ہیں،اور جمعہ کی نماز کے بعد چار سنت مؤکدہ اور دو سنت غیرمؤکدہ ہیں۔(۴) ان میں کوتاہی نہیں کرنی چاہئے۔ اللہ تعالیٰ تمام مسلمان بھائیوں کو توفیق عطا فرمائیں اور آخرت کی کامیابی نصیب فرمائیں۔