جمعہ‌کی‌پہلی‌اَذان‌اور‌بیس‌تراویح‌کب‌شروع‌ہوئیں؟

سوال:۔

اللہ پاک مجھے معاف فرمائیں، معلومات اور اِطمینان کے لئے معلوم کر رہا ہوں۔ بزرگوں سے سنا ہے کہ کسی بھی صحابی رسول پر تنقید کرنا سخت منع اور ناقابلِ معافی گناہ ہے، لیکن اِیمان کو مضبوط بنانے کے لئے معلومات چاہتا ہوں، وہ یہ کہ ہمارے پیارے نبی حضرت محمد مصطفی صلی اللہ علیہ وسلم دِین کو مکمل کرکے تشریف لے گئے، اب دِین میں کسی قسم کی ترمیم یا تخفیف کی کسی کو اِجازت نہیں، اور نہ ہی کوئی گنجائش رہی، تو یہ حضرت عمرؓ نے جمعہ میں دُوسری اَذان کیسے ایجاد کرلی؟ اسی طرح نمازِ تراویح حضور صلی اللہ علیہ وسلم نے آٹھ پڑھی تھیں، تو یہ حضرت عمرؓ نے بیس رکعت کیسے مقرّر کردیں؟

جواب:۔

جمعہ کی پہلی اَذان کا اِضافہ حضرت عثمان رضی اللہ عنہ نے کیا تھا،(۱) اور بیس تراویح پر حضرت عمر رضی اللہ عنہ نے جمع کیا تھا، آنحضرت صلی اللہ علیہ وسلم سے بیس تراویح بھی منقول ہے، مگر اس کی سند کمزور ہے۔(۲)

حضرت عمرؓ نے صحابہ کرامؓ کی موجودگی میں تراویح کی جماعت شروع کرائی، اور بیس رکعت پر لوگوں کو جمع کیا، تو یقینا انہوں نے سنتِ نبوی کو اَپنایا ہوگا، چنانچہ تین خلفائے راشدینؓ کے زمانے میں صحابہؓ کا اس پر اِتفاق رہا، اور بعد میں اَئمہ اَربعہؒ نے بیس رکعات کو اِختیار کیا، جس سے واضح ہوتا ہے کہ یہی منشائے نبوی تھا۔ حضرت عثمانؓ کا اَذانِ اوّل کو شروع کرنا ان کے اِجتہاد پر مبنی تھا، انہوں نے یہ سمجھا کہ اَذان کی مشروعیت اِطلاع کے لئے ہے، اور خطبے کی جو اَذان مسجد کے دروازے پر ہوتی ہے، آبادی کے زیادہ دُور ہوجانے کی وجہ سے وہ اِطلاع کے لئے کافی نہیں، اس سے انہوں نے اس اَذان سے پہلے ایک اور اَذان زوراء پر کہلانی شروع کی، اور صحابہ کرامؓ میں سے کسی نے ان کے اس فعل پر نکیر نہیں کی، بلکہ سب نے اس سے اِتفاق کیا، اور حضراتِ خلفائے راشدینؓ کے فیصلوں کو شریعت پر قانونی حیثیت حاصل ہے، چنانچہ آنحضرت صلی اللہ علیہ وسلم کا اِرشاد ہے: ’’لازم پکڑو میری سنت کو اور خلفائے راشدین کی سنت کو‘‘ (مشکوٰۃ ص:۳۰)۔(۳) اور دِین کی تکمیل اُصول وکلیات کے اِعتبار سے ہے، ان اُصول وکلیات کی روشنی میں حضرات خلفائے راشدینؓ نے جو فیصلے کئے یا بعد کے مجتہدین نے فیصلے کئے، وہ بھی تکمیلِ دِین میں داخل ہیں۔