مساجد میں ذاتی سوال کرنا اور مدرّس کا چندہ کرنا

سوال:۔

اکثر دیکھنے میں آیا ہے کہ مساجد میں سائل حضرات نماز ختم ہوتے ہی اپنا سوال اور اپنی مجبوری کا اِظہار شروع کردیتے ہیں، اور اسی وقت نمازی حضرات ’’خاموش رہو، خاموش رہو، بیٹھ جاؤ، مسجد ہے‘‘ کے جملے ادا کرکے سائل کو ڈانٹ ڈپٹ کرتے ہیں، جس سے نمازیوں کی نماز میں خلل واقع ہوتا ہے۔ کیا اس طرح مسجدوں میں سوال کرنا جائز ہے؟ اسی طرح رمضان میں مدارس کے چندے کا اِعلان نمازوں کے بعد ہوتا ہے، اس کے بارے میں کیا شرعی حکم ہے؟ کیا ان لوگوں کو مسجد سے باہر آنے کے بعد دینا جائز ہے؟

جواب:۔

پیشہ ور گداگروں کا مسجد میں بھیک مانگنا جائز نہیں، بلکہ ان کو دینا بھی جائز نہیں،(۱) تاہم ہمارے یہاں جو رِواج ہوگیا ہے کہ سائل اُٹھ کر سوال کرتا ہے تو لوگ ’’بیٹھ جاؤ، بیٹھ جاؤ‘‘ کے نعرے بلند کرنا شروع کردیتے ہیں، جس سے نمازیوں کو تکلیف ہوتی ہے، اور ان کی نماز میں خلل واقع ہوتا ہے، یہ بھی صحیح نہیں۔(۲)

مسجد کی اِنتظامیہ کو ایسا اِنتظام کرنا چاہئے کہ ان بھکاریوں اور گداگروں کو مسجد میں سوال کرنے کا موقع نہ دیں۔

۲:۔ کسی شخص کی ضرورت کے لئے اِمام مسجد کا یا معزّزین میں سے کسی آدمی کا سوال کرنا، اور اِعلان کرنا دُرست ہے،(۳) چنانچہ آنحضرت صلی اللہ علیہ وآلہ وسلم نے بعض ایسے حضرات کے لئے جو مستحق تھے، مسجد میں چندہ فرمایا، اور صحابہ کرام رضوان اللہ علیہم اجمعین کو ان کی اِعانت کی ترغیب دی۔(۴)

۳:۔ اسی طرح دِینی مدارس کے لئے یا مساجد کے لئے یا اور دِینی ضروریات کے لئے مسجد میں اِعلان کرنا جائز ہے، آنحضرت صلی اللہ علیہ وسلم نے ’’جیش العسرت‘‘ کے لئے چندے کا اِعلان فرمایا تھا۔(۵)