مسافروں کی ضرورت کے پیشِ نظر دُوسری مسجد بنانا

سوال:۔

ایک گاؤں جو کہ چالیس گھروں پر مشتمل ہے، جس میں ایک مسجد ایک صدی سے قائم ہے، اور مستقل نمازی زیادہ سے زیادہ پانچ ہیں۔ اب گاؤں والوں کا خیال ہے کہ پُرانی مسجد چونکہ گاؤں کے بیچ میں ہے، جہاں مسافروں کو نماز پڑھنے میں تکلیف ہوتی ہے، اس لئے گاؤں کے کنارے پر دُوسری مسجد تعمیر کی جائے۔ دُوسری مسجد کی تعمیر کے بعد پُرانی مسجد ویران ہوجائے گی۔ کیا اس صورت میں نئی مسجد تعمیر کرنا جائز ہے؟

اچھا اگر مسجد تعمیر بھی ہوجائے تو اس صورت میں نمازِ جمعہ اور تراویخ کس مسجد میں ادا کی جائیں؟

جواب:۔

اگر نئی مسجد کی ضرورت ہو، تو اس کا بنانا صحیح ہے،(۱) مگر پُرانی مسجد کو معطل کردینا وبال کا موجب ہے۔(۲) تراویح کی نماز دونوں مسجدوں میں ہوسکتی ہے، اور جمعہ کسی میں نہیں ہوسکتا، کیونکہ چھوٹی بستی میں جمعہ نہیں ہوتا۔(۳)