مریض پر نماز کیوں معاف نہیں، جبکہ سرکاری ڈیوٹی سے ریٹائرڈ ہونے والے کو پنشن ملتی ہے؟

سوال:۔

ایک شبہ کا جدید ذہن کے مطابق جواب دینا ضروری ہے، مثلاً: ایک صاحب کہتے ہیں کہ گورنمنٹ سرکار کا کوئی ملازم معذور ہوجائے تو اس کا سرکار کی جانب سے معاوضہ ملتا ہے، اور ریٹائر ہوجائے تو پنشن ملتی ہے، یہ عجیب قانونِ خداوندی ہے کہ مریض کی نماز معاف نہیں اور معذور کو فدیہ کا حکم بھی ملتا ہے؟

جواب:۔

قانونِ خداوندی صحیح ہے، سائل کو معذور کا مطلب سمجھنے میں غلطی ہوئی ہے، نماز کے بارے میں قانون یہ ہے کہ جو شخص کھڑا نہ ہوسکتا ہو، وہ بیٹھ کر پڑھے، اور جو بیٹھ کر نہ پڑھ سکتا ہو، وہ سر کے اِشارے سے پڑھے، اور جو اِشارہ بھی نہ کرسکتا ہو وہ معذور ہے،(۱) اور اگر اس معذوری میں مرگیا تو اس کو آدھی پنشن نہیں ملے گی، بلکہ پوری تنخواہ ملے گی۔

اور روزے کے بارے میں یہ قانون ہے کہ جو شخص روزے پر قادر ہو، وہ روزہ رکھے، اور جو روزے پر قادر نہ ہو، وہ اس کا بدل (فدیہ) ادا کردے،(۲) اور جو اس پر بھی قادر نہ ہو، وہ معذور ہے، اس سے مؤاخذہ نہیں ہوگا، بلکہ اس کو پورا ثواب ملے گا۔(۳)

سائل کی غلطی یہ ہے کہ اس نے مطلق مریض کو معذور سمجھ لیا، حالانکہ مطلق مریض کسی گورنمنٹ کے قانون میں بھی معذور نہیں۔ معذور وہ ہے جو تمام تر رعایتوں کے باوجود کام کرنے پر قادر نہ ہو، اور قانونِ خداوندی میں معذور کو آدھی پنشن نہیں دی جاتی، بلکہ معذوری کے اَیام کا پورا اَجر وثواب دِیا جاتا ہے۔(۴)