وضو‌کے‌مسائل

ہاتھ پر چوٹ لگی ہو تو کیا وضو کریں یا تیمم؟

سوال:۔

اگر ایک ہاتھ پر چوٹ لگ جائے، میرا مطلب ہے کہ چھری سے زخم ہو اور پٹی بندھی ہو اور پانی لگانے کی ممانعت ہو، تو کیا وضو ایک ہاتھ سے کریں گے یا تیمم کریں؟ پتھر پر تیمم جائز ہے، خواہ اس پر غبار نہ ہو۔ اس سے کیا مراد ہے؟ تیمم کا طریقہ بتادیں۔ ہمارے محلے کا پانی اکثر بند ہوجاتا ہے اور پانی نہ ہونے کی بنا پر ہم وضو نہیں کرسکتے، اس لئے نماز بھی نہیں پڑھتے، حالانکہ یہ گناہ کی بات ہے، ہمیں اب اس کا اِحساس ہوگیا ہے، لہٰذا برائے مہربانی تیمم کرنے کا طریقہ اور کس پتھر پر کریں؟ اس کی وضاحت کردیجئے۔

جواب:۔

اگر کوئی وضو کرانے والا ہو یا ایک ہاتھ سے وضو کرسکے تو وضو کرنا لازم ہے، زخم کی جگہ مسح کرلیا جائے۔ اور اگر وضو پر قدرت نہ ہو، تب تیمم جائز ہے۔(۱) پاک پتھر پر تیمم دُرست ہے، خواہ اس پر غبار نہ ہو، لیکن کچی مٹی کا ڈھیلا ہو تو اچھا ہے۔(۲) تیمم کا طریقہ یہ ہے کہ پاک مٹی پر دونوں ہاتھ مارکر جھاڑ لیں اور منہ پر مل لیں، پھر دوبارہ دونوں ہاتھ مٹی پر مارکر جھاڑ لیں اور دونوں ہاتھوں پر کہنیوں سمیت مل لیں۔(۳) تیمم صرف اس صورت میں جائز ہے کہ پانی کے اِستعمال پر قدرت نہ ہو، یا پانی ایک میل دُور ہو۔ شہر میں تیمم جائز نہیں۔(۴)

(۱) والأصل انہ متی أمكنہ إستعمال الماء من غیر لحوق ضرر فی نفسہ أو مالہ وجب إستعمالہ۔ (عالمگیری ج:۱ ص:۲۸)۔ أیضًا: إن وجد خادمًا أی من تلزمہ طاعتہ كعبدہ وولدہ وأجیرہ لَا یتیمم إتفاقًا وإن وجد غیرہ ممن لو استعان بہ أعانہ، ولو زوجتہ فظاھر المذھب أنہ لَا یتیمم أیضًا بلا خلاف۔ (شامی ج:۱ ص:۲۳۳ باب التیمم)۔
(۲) وبالحجر علیہ غبار أو لم یكن بأن کان مغسولًا أو أملس مدقوقًا أو غیر مدقوق كذا فی فتاویٰ قاضیخان۔ (عالمگیری ج:۱ ص:۲۷)۔ ویجوز التیمم عند أبی حنیفۃ ومحمد بكل ما کان من جنس الأرض وھو ما إذا طبع لَا ینطبع ولَا یلین، وإذا احرق لَا یصیر رمادًا ۔۔۔ کالتراب والرمل إلٰی آخرہ قدم الترب لأنہ مجمع علیہ۔ (الجوھرۃ النیرۃ ج:۱ ص:۲۲)۔
(۳) والتیمم ضربتان یمسح بإحداھما وجھہ وبالاُخریٰ یدیہ إلی المرفقین لقولہ علیہ السلام: التیمم ضربتان ضربۃ للوجہ وضربۃ للیدین وینفض یدیہ بقدر ما یتناثر التراب كیلا یصیر مثلۃ۔ (ھدایۃ ج:۱ ص:۵۰)۔ أیضًا: عن جابر عن النبی صلی اللہ علیہ وسلم فی التیمم: ضربۃ للوجہ وضربۃ للذراعین إلی المفرقین۔ (شرح مختصر الطحاوی ج:۱ ص:۴۱۷)۔
(۴) ومن لم یجد الماء وھو مسافر أو کان خارج المصر وبینہ وبین المصر الذی فیہ الماء نحو المیل ھو المختار فی المقدار۔ (ھدایۃ) (واختیار) ومثلہ لو کان فی المصر وبینہ وبین الماء ھٰذا المقدار، لأن الشرط ھو العدم، فأینما تحقّق جاز التیمم (بحر)۔ عن (الأسرار) أكثر، وفی شرحہ: وإنما قال خارج المصر لأن المصر لَا یخلو عن الماء۔ (اللباب فی شرح الكتاب ج:۱ ص:۵۱، ۵۲، طبع قدیمی كتب خانہ)۔ أیضًا: ویتیمم فی غیر الأمصار والقریٰ إذا أعوز الماء۔ قال أبوبكر: وذالك لقول اللہ تعالٰی: ﵟ فَلَمۡ تَجِدُواْ مَآءٗ فَتَيَمَّمُواْ صَعِيدٗا طَيِّبٗا ﵞ(شرح مختصر الطحاوی ج:۱ ص:۴۱۴ باب التیمم)۔