نبوّت‌تشریعی‌اور‌غیرتشریعی‌میں‌فرق

سوال:۔

اِمام عبدالوہاب شعرانیؒ فرماتے ہیں: ’’مطلق نبوّت نہیں اُٹھائی گئی، محض تشریعی نبوّت ختم ہوئی ہے۔ جس کی تائید حدیث میں حفظ القرآن ۔۔۔الخ۔ سے بھی ہوتی ہے (جس کے معنی یہ ہیں کہ جس نے قرآن حفظ کرلیا، اس کے دونوں پہلوؤں سے نبوّت بلاشبہ داخل ہوگئی) اور آنحضرت صلی اللہ علیہ وسلم کے قول مبارک ’’لَا نَبِيَّ بَعْدِيْ وَلَا رَسُوْلَ‘‘ سے مراد صرف یہ ہے کہ: میرے بعد کوئی ایسا نبی نہیں جو شریعت لے کر آئے۔ محی الدین ابن عربیؒ فرماتے ہیں: ’’جو نبوّت رسولِ اکرم صلی اللہ علیہ وسلم کے آنے سے منقطع ہوئی ہے، وہ صرف غیرتشریعی نبوّت ہے نہ کہ مقامِ نبوّت۔‘‘ اللہ تعالیٰ اپنے بندوں پر مہربان ہے اس لئے اس نے ان کی خاطر تشریعی نبوّت باقی رکھی۔ مذکورہ بالا دو اقوال واضح فرمادیں۔ تشریعی اور غیرتشریعی بھی واضح فرمادیں، کیا اس کو اپنے لئے دلیل بناسکتے ہیں؟

جواب:۔

شیخ ابنِ عربیؒ اولیاء اللہ کے کشف و اِلہام کو ’’نبوّت‘‘ کہتے ہیں اور حضرات انبیائے کرام علیہم السلام کو جو منصب عطا کیا جاتا ہے اسے ’’نبوّتِ تشریعی‘‘ کہتے ہیں، یہ ان کی اپنی اِصطلاح ہے۔ چونکہ انبیائے کرام کی نبوّت ان کے نزدیک تشریع کے بغیر نہیں ہوتی، اس لئے ولایت والی نبوّت واقعتا نبوّت ہی نہیں۔ علامہ شعرانیؒ اور شیخ ابنِ عربیؒ بھی انبیائے کرام والی نبوّت (جو ان کی اِصطلاح میں نبوّتِ تشریعی کہلاتی ہے) کو ختم مانتے ہیں اور ولایت کو جاری۔ اور یہی عقیدہ اہلِ سنت والجماعت کا ہے، فرق صرف اِصطلاح کا ہے۔(۱) واﷲ اعلم!

تفصیل کے لئے دیکھیں: احتسابِ قادیانیت ج:۲ ص:۱۴۴، ایضاً بوادر النوادر ص:۵۲۵ تا ۵۳۵۔