انبیائے کرام علیہم السلام

حضور صلی اللہ علیہ وسلم کی نمازِ جنازہ اور تدفین کس طرح ہوئی اور خلافت کیسے طے ہوئی؟

سوال:۔

نبی اکرم صلی اللہ علیہ وسلم کی وفات کے بعد ان کی نمازِ جنازہ کس نے پڑھائی؟ اور آپ کی تدفین اور غسل میں کن کن حضرات نے حصہ لیا؟ اور آپ کے بعد خلافت کے منصب پر کس کو فائز کیا گیا اور کیا اس میں بالاتفاق فیصلہ کیا گیا؟

جواب:۔

۳۰؍صفر (آخری بدھ) کو آنحضرت صلی اللہ علیہ وسلم کے مرض الوصال کی اِبتدا ہوئی،(۱)۸؍ربیع الاوّل کو بروز پنجشنبہ منبر پر بیٹھ کر خطبہ ارشاد فرمایا، جس میں بہت سے اُمور کے بارے میں تاکید و نصیحت فرمائی۔(۲) ۹؍ربیع الاوّل شبِ جمعہ کو مرض نے شدّت اختیار کی، اور تین بار غشی کی نوبت آئی، اس لئے مسجد تشریف نہیں لے جاسکے، اور تین بار فرمایا کہ: ’’ابوبکر کو کہو کہ لوگوں کو نماز پڑھائیں!‘‘ چنانچہ یہ نماز حضرت ابوبکر رضی اللہ عنہ نے پڑھائی اور باقی تین روز بھی وہی امام رہے، چنانچہ آنحضرت صلی اللہ علیہ وسلم کی حیاتِ طیبہ میں حضرت ابوبکر رضی اللہ عنہ نے سترہ نمازیں پڑھائیں، جن کا سلسلہ شبِ جمعہ کی نمازِ عشاء سے شروع ہوکر ۱۲؍ربیع الاوّل دوشنبہ کی نمازِ فجر پر ختم ہوتا ہے۔(۳)

علالت کے ایام میں ایک دن حضرت عائشہ رضی اللہ عنہا کے گھر میں (جو بعد میں آپ صلی اللہ علیہ وسلم کی آخری آرام گاہ بنی) اکابر صحابہ رضی اللہ عنہم کو وصیت فرمائی:

’’انتقال کے بعد مجھے غسل دو اور کفن پہناؤ اور میری چارپائی میری قبر کے کنارے (جو اسی مکان میں ہوگی) رکھ کر تھوڑی دیر کے لئے نکل جاؤ، میرا جنازہ سب سے پہلے جبریلؑ پڑھیں گے، پھر میکائیلؑ، پھر اسرافیلؑ، پھر عزرائیلؑ، ہر ایک کے ہمراہ فرشتوں کے عظیم لشکر ہوں گے، پھر میرے اہلِ بیت کے مرد، پھر عورتیں بغیر امام کے (تنہا تنہا) پڑھیں، پھر تم لوگ گروہ در گروہ آکر (تنہا تنہا) نماز پڑھو۔‘‘

چنانچہ اسی کے مطابق عمل ہوا، اوّل ملائکہ نے آپ صلی اللہ علیہ وسلم کی نماز پڑھی، پھر اہلِ بیت کے مردوں نے، پھر عورتوں نے، پھر مہاجرین نے، پھر انصار نے، پھر عورتوں نے، پھر بچوں نے، سب نے اکیلے اکیلے نماز پڑھی، کوئی شخص اِمام نہیں تھا۔(۴)

آنحضرت صلی اللہ علیہ وسلم کو غسل حضرت علی کرّم اللہ وجہہ نے دیا، حضرت عباس اور ان کے صاحبزادے فضل اور قثم رضی اللہ عنہم ان کی مدد کر رہے تھے، نیز آنحضرت صلی اللہ علیہ وسلم کے دو موالی حضرت اُسامہ بن زید اور حضرت شقران رضی اللہ عنہما بھی غسل میں شریک تھے، آنحضرت صلی اللہ علیہ وسلم کو تین سحولی (موضع سحول کے بنے ہوئے) سفید کپڑوں میں کفن دیا گیا۔(۵)

آنحضرت صلی اللہ علیہ وسلم کے وصال کے روز (۱۲؍ربیع الاوّل) کو سقیفہ بنی ساعدہ میں حضرت ابوبکر صدیق رضی اللہ عنہ کے ہاتھ پر بیعتِ خلافت ہوئی، اوّل اوّل مسئلۂ خلافت پر مختلف آراء پیش ہوئیں، لیکن معمولی بحث و تمحیص کے بعد بالآخر حضرت ابوبکر صدیق رضی اللہ عنہ کے انتخاب پر اتفاق ہوگیا اور تمام اہلِ حل و عقد نے ان کے ہاتھ پر بیعت کرلی۔(۶)

(۱) فصل فی حوادث السَّنَۃ الحادیۃ عشرۃ من الھجرۃ ۔۔۔ وفیھا مرض رسول اللہ صلی اللہ علیہ وسلم فی آخر الأربعاء من صفر، وکان ذٰلک الیوم ثلٰثین من شھر صفر المذکور، ۔۔۔ وکانت مدّۃ مرضہ صلی اللہ علیہ وسلم ثلاثۃ عشر یومًا علی القول المشہور الذی علیہ الأکثرون ۔ (بذل القوۃ فی حوادث سنی النبوۃ ص:۲۹۶ طبع جامعۃ السند، حیدرآباد پاکستان)۔
(۲) وفیھا فی أیام ذٰلک المرض خرج إلی المنبر فخطب علیہ قاعدًا لعذر المرض وأخبر فیھا بأُمور کثیرۃ تحتاج إلیہ الاُمّۃ وکانت تلک الخطبۃ یوم الخمیس الثامن من شھر ربیع الأوّل۔ (بذل القوۃ ص:۲۹۸ طبع جامعۃ السند، حیدرآباد، پاکستان)۔
(۳) وفیھا لما اشتد علیہ صلی اللہ علیہ وسلم المرض لیلۃ الجمعۃ التی ھی التاسعۃ من شھر ربیع الأوّل، فاغمی علیہ صلی اللہ علیہ وسلم ثلاث مرات، ولم یستطع الخروج إلٰی صلٰوۃ العشاء، قال ثلاث: مروا أبابکر فلیصل بالناس، فصلّٰی أبوبکر رضی اللہ عنہ مقام النبی صلی اللہ علیہ وسلم تلک العشاء، ثم لم یزل یصلی بھم الصلٰوۃ الخمیس فی تلک الأیام الثلاثۃ الباقیۃ، حتّٰی کانت صلٰوۃ أبی بکر رضی اللہ عنہ التی صلاھا بھم فی حیاتہ صلی اللہ علیہ وسلم سبع عشرۃ صلٰوۃ، مبدأھا صلٰوۃ العشاء من لیلۃ الجمعۃ، ومنتھاھا صلٰوۃ الفجر من یوم الْإثنین الثانی عشر من شھر ربیع الأوّل۔ (بذل القوۃ فی حوادث سنی النبوۃ ص:۳۰۰ طبع جامعۃ السند، حیدرآباد، پاکستان)۔
(۴) وفیھا فی أیام مرضہ صلی اللہ علیہ وسلم وکونہ صلی اللہ علیہ وسلم فی بیت عائشۃ رضی اللہ عنھا، أوصٰی لأصحابہ فقال: إذا أنا مِتُّ فاغسلونی وکفنونی واجعلونی علٰی سریری ھٰذا، علٰی شفیر قبری فی بیتی ھٰذا ثم أخرجوا عنّی ساعۃ فأوّل من یصلّی علیَّ جبریل، ثم میکائیل، ثم إسرافیل، ثم ملک الموت، کل واحد منھم بجنودہ، ۔ثم یصلّی علیَّ رجال أھل بیتی، ثم نسائھم، ثم ادخلوا أنتم فوجًا فوجًا فصلّوا علیَّ، فوقع کما قال صلی اللہ علیہ وسلم، فصلّی علیہ صلی اللہ علیہ وسلم أوّلًا الملائکۃ علیھم السلام، ثم رجال أھل بیتہ، ثم نسائھم، ثم رجال المھاجرین، ثم الأنصار، ثم النساء، ثم الغلمان، فصلّوا کلھم افذاذًا منفردین لَا یؤمھم أحد۔ (بذل القوۃ ص:۲۹۹ وأیضًا الروض الأنف ج:۲ ص:۳۷۷)۔
(۵) وفیھا وقع أنہ لما توفی صلی اللہ علیہ وسلم غسلہ عَلیٌّ وحضر معہ العباس وابناہ الفضل وقثم ومولیا رسول اللہ صلی اللہ علیہ وسلم ورضی عنھما اُسامۃ وشقران (بضم الشین المعجمۃ وسکون القاف) رضی اللہ عنھم، وکفن فی ثلاثۃ أثواب بیض سھولیۃ۔ (بذل القوۃ ص:۳۰۳)۔
(۶) فلما مات (صلی اللہ علیہ وسلم) ۔۔۔ فجاء الصدیق من منزلہ حین بلغہ الخبر فدخل علٰی رسول اللہ صلی اللہ علیہ وسلم منزلہ وکشف الغطاء عن وجھہ وقبّلہ وتحقق أنہ مات ۔۔۔ ورجع الناس کلھم إلیہ وبایعہ فی المسجد جماعۃ من الصحابۃ ووقعت شبھۃ لبعض الأنصار وقام فی أذھان بعضھم جواز إستخلاف خلیفۃ من الأنصار وتوسط بعضھم بین أن یکون أمیر من المھاجرین وأمیر من الأنصار، حتّٰی بیّن لھم الصدیق أن الخلافۃ لَا تکون إلّا فی قریش، فرجعوا إلیہ وأجمعوا علیہ کما سنبیّنہ وتنبّہ علیہ۔ (البدایۃ والنھایۃ ج:۵ ص:۲۴۴)۔ تفصیل کے لئے ملاحظہ ہو: البدایۃ والنھایۃ ج:۵ ص:۲۴۵ تا ۲۵۰ قصۃ سقیفۃ بنی ساعدۃ۔